Finndu eldmóðinn hjá Kaj Mickos í Ásbrú! ÓKEYPIS á laugardaginn 5.sept kl.11

 

	Sjá nánar á: www.asbru.is

Ný hugmynd tilbúin til framleiðslu á 3 dögum! Hvaða rugl er þetta!

Prófessorinn og hönnuðurinn Kaj Mickos hefur sannreynt þetta síðastliðin 20 ár í Svíþjóð og aðstoðað um 25 þúsund  einstaklinga við að koma hugmyndum sínum í framkvæmd.  Hann á sjálfur 31 einkaleyfi og hefur stofnað 14 fyrirtæki á ólíkum sviðum. Undanfarin tvö ár hefur hann verið með tvær sjónvarpsþáttaraðir í TV8 í Svíþjóð. Önnur heitir „72 hours race“ þar sem  hugmynd er útfærð og undirbúin til framleiðslu á 72 tímum. Hin þáttaröðin heitir „Innovatörarna“ þar sem Kaj fer inní starfandi fyrirtæki og hjálpar til við lausn á ákveðnu vandamáli.

Kaj Mickos er stofnandi Innovation Plant eða Nýsköpunarverksmiðjunnar.

Hann segir:
- fyrirtæki þurfa stöðuga endurnýjun til að halda forskoti í samkeppni
- það er hægt að móta nýsköpunarferlið
- markmiðið er að koma nýrri vöru á markað
- hugmyndasmiðir eru alls staðar í samfélaginu
- flestir þeirra sem stuðla að nýsköpun eru nýgræðingar sem þurfa aðstoð
- þverfaglega vinnu þarf til þess að koma nýrri vöru á markað
- það eru fleiri en færri hugmyndir, sem hægt er að þróa til árangurs
- mikilvægt er að koma sem fyrst inn með faglega þekkingu
- það er ómögulegt að dæma í upphafi hvort hugmynd nær árangri á markaði
- árangur er undir verkefnastjóranum komið
- ómögulegt er að ljúka verkefni án peninga

Markmið Nýsköpunarverksmiðju Kaj Mickos er að:
- auka vöxt og verðmætasköpun samfélagsins með því að tengja saman hugvit og þekkingu og leysa þannig nýsköpunarkraftinn úr læðingi.
Einstaklingurinn er settur í fyrirrúm, geta hans og þekking. Allir eiga möguleika á að ná árangri ef þeim er gefið tækifæri.

Það er mikilvægt að hver einasta manneskja sem tekur þátt í nýsköpunarferlinu hafi eldmóð, metnað og hvatningu til að taka þátt í að leysa verkefnið og finna lausnir.
Það verður í höndum hugmyndaríks fólks að hjálpa Íslandi upp úr öldudalnum.
Hugvit skapar atvinnu.  Virkjum því hugvitið!

Laugardaginn 5.september kl.11 í Ásbrú í Reykjanesbæ mun Kaj Mickos halda fyrirlestur og vera með vinnustofu sem hann kallar „Market race“, þar sem 4 lið munu keppa um að leysa ákveðið vandamál. Þetta eru 10 manna hópar og er fundargestum boðið að taka  þátt. Veittar verða viðurkenningar í lokin fyrir árangursríkustu lausnina.
Þessi fyrirlestur er samvinnuverkefni Ásbrúar, KVENN og Samtök frumkvöðla og hugvitsmanna.
Aðgangur er ókeypis og allir velkomnir! Hægt að slá tvær flugur í einu höggi því Ljósanótt er í hámarki! Skráið ykkur á [e-mail]

Sjá nánar á: www.asbru.is

Frumkvöðlar á ÍNN í kvöld 31.ág. kl.20.30

Tvær konur verða gestir í þættinum Frumkvöðlar. Önnur heitir Þuríður Guðmundsdóttir sem fékk verðlaun 2007, frá Evrópusamtökum kvenna í nýsköpun (EUWIIN), fyrir græðandi smyrsl úr íslenskum jurtum. Hin konan heitir Jóna Björg Sætran og hefur m.a. unnið með Brian Tracy og er með námskeið m.a. sem heita Blómstraðu!
Gaman að heyra hvernig hugmyndir kvikna og hvernig draumar rætast.
Hvet ykkur til þess að horfa á þáttinn!

Kvikasilfurmengun eða ljósdíóður?

Sparperur innihalda kvikasilfur! Hvar og hvernig á að endurvinna þær????

Kvikasilfur er frumefni (Hg) og í náttúrunni kemur það einkum fyrir sem steintegundin sinnóber (HgS — kvikasilfurssúlfíð, e. cinnabar).

Kvikasilfur er eitur. Kvikasilfur er ekki bara eitrað, það er baneitrað. Bannvænn skammtur kvikasilfursalts er um 1 g. Kvikasilfurmálmurinn sem slíkur er ekki eitraður þó hann sé gleyptur þar sem hann frásogast ekki úr meltingarvegi.
Kvikasilfur er í raun vökvi en telst til þungmálma. Þungmálmar þurfa ekki að safnast fyrir í miklu magni í lífverum til þess að eituráhrif komi fram, sbr. eituráhrif blýs og kvikasilfurs á miðtaugakerfið.
Vegna rokgirni kvikasilfurs berst það auðveldlega langar vegalengdir í andrúmslofti. Þetta hefur valdið því, að mikið magn kvikasilfurs hefur fundist fjarri uppsprettum þess. Almennt hefur verið talið varasamt að magn kvikasilfurssambanda (methyl mercury) sé meiri en 0,5mg/kg og að neysla kvikasilfurs megi ekki fara yfir 0,5mg/viku. Lægri gildi eru fyrir barnshafandi konur. Kvikasilfrið hamlar starfsemi efnahvata í frumum líkamans með því að bindast sulfhydryl hópum (-SH) í frumunum. Þetta veldur því, að kvikasilfur er eitrað öllum frumum líkamans.

Helstu eituráhrif kvikasilfurs eru:

1) Bráð eituráhrif kvikasilfurs:
a) Eftir neyslu kvikasilfurssalta: Málmbragð, kviðverkir, blóðugur niðurgangur jafnvel í nokkrar vikur. Minnkaður þvagútskilnaður. Nýrnabilun, sem veldur dauða.
b) Eftir innöndun kvikasilfurgufu: Bólgur í munnslímhúð, aukin munnvatnsframleiðsla, málmbragð, niðurgangur, lungnabólga, nýrnaskemmdir, svimi, klaufska, taltruflanir og banvænir krampar.
c) Aklylsambönd kvikasilfurs safnast fyrir í miðtaugakerfinu og valda truflun á samhæfingu hreyfinga (ataxia), rykkjasótt (chorea), og krömpum. Yfirleitt er um að ræða varanlegar skemmdir á miðtaugakerfinu.

2) Langvinn eituráhrif kvikasilfurs:
a) Ofsakláði (urticaria), húðeksem, bólgur í slímhúðum, aukin munnvatnsframleiðsla, niðurgangur, blóðleysi, fækkun hvítra blóðkorna, lifrarskemmdir og nýrnabilun. Hárlos. Einnig truflanir á andlegri starfsemi, ekki síst hjá börnum.

Af hverju er ekki veðjað á ljósdíóður sem framtíðarlausn?????

Örlög glóperunnar á Íslandi ráðast senn

Algjörlega ósammála!

Ég er útflytjandi og hef ekki orðið vör við neikvæðni eða minni viðskipti.

Vörumerkið Ísland stórskaddað

Frumkvöðlar á ÍNN kl.20.30 í kvöld

Þátturinn Frumkvöðlar á ÍNN kl.20.30 í kvöld. Viðtal við uppfinningakonuna Huldu Sveinsdóttur og eiginmann hennar Hrafn Jónsson. Þau eru sannkallaðir þúsundþjalasmiðir. Hvet ykkur til að horfa á þáttinn og sjá hvað þau eru að bralla.

Allir á Austurvöll!

Ég mætti á Austurvöll í gær og var hissa á því hvað fáir voru þar. Ég hvet alla til þess að mæta og sína samstöðu og mótmælum Icesave samningnum.
Einungis vaxtagreiðslur á ári jafngilda verðmæti 200 000 tonna þorskafla!

Alkabréfin segja alla söguna!

Ég fékk eftirfarandi sögu senda og leyfi mér að birta hana hér:
"Hilda er bareigandi í Berlín. Til þess að auka veltuna þá ákveður hún að leyfa dyggum viðskiptavinum—sem flestir eru atvinnulausir alkar—að drekka út á krít.

Hún skráir allt sem drukkið er í þykkan kladda. Þegar þetta þægilega fyrirkomulag spyrst út þá flykkjast nýir viðskiptavinir á barinn. Frelsi fólks til þess að njóta augnabliksins og borga seinna gefur Hildu valið tækifæri til þess að hækka verðið á vinsælustu veigunum, bjór og víni

Salan eykst gífurlega. Ungur og efnilegur lánafulltrúi í hverfisbankanum gerir sér grein fyrir að þessar skuldir viðskiptavinanna eru framtíðarverðmæti. Hann hækkar því yfirdráttarheimild Hildu í bankanum. Lánafulltrúinn telur þetta vandræðalaust vegna þess að skuldir alkanna eru haldgóð veð.

Í höfuðstöðvum bankans breyta sérfræðingar í æðri peningalist þessum viðskiptaskuldum í Drykkjuskuldabréf, Alkabréfavafninga og Gubbuafleiður. Þessi verðbréf—sem virt áhættumatsfyrirtæki hafa (gegn þóknun) stimplað AAA gæðastimpli—ganga síðan kaupum og sölum út um allan heim. Raunverulega skilur enginn hvað nöfn bréfanna þýða eða hvernig þau eru tryggð. Samt sem áður halda þau áfram að hækka. Þau eru metsöluvara.

Einn góðan veðurdag, þrátt fyrir að bréfin séu enn á uppleið, þá ákveður áhættusérfræðingur bankans að nú sé tímabært að drykkjuhrútarnir á bar Hildu borgi eitthvað upp í skuldirnar. Þeir geta það hins vegar ekki. Hilda getur því ekki staðið í skilum við sína skuldunauta og lýsir yfir gjaldþroti. Drykkju- og Alkabréf falla um 95%. Gubbubréfin gera betur og ná stöðugkeika eftir 80% fall. Nýr veruleiki blasir við hjá fyrirtækjum sem seldu barnum á lánakjörum og hafa jafnvel líka fjárfest í fyrrnefndum bréfum. Heildsalan sem seldi Hildu vín er gjaldþrota og fyrirtækið sem seldi bjórinn er yfirtekið af keppinauti.

Eftir dramatísk fundahöld og andvökustundir sem standa samfleytt í marga sólarhringa þá ákveða stjórnvöld að bjarga bankanum.

Nýr skattur er lagður á. Bindindismenn eru látnir borga brúsann."

Myndir frá landsfundi 2009

Hér má sjá nokkrar myndir, sem lýsa stemningunni á Landsfundinum 2009.

Straumhvörf í íslenskum stjórnmálum

Í dag urðu merkileg straumhvörf í íslenskum stjórnmálum, er Bjarni Benediktsson var kosinn formaður flokksins. Hlaut hann yfirburða kosningu. Kosningabaráttan var í senn stutt og drengileg og var báðum frambjóðendum til mikils sóma og í raun nauðsynleg Sjálfstæðisflokknum og honum til framdráttar.

Þorgerður Katrín Gunnarsdóttir hlaut yfir 80% atkvæða í kjöri varaformanns flokksins.  Hún hefur fyrir löngu sannað sig á vettvangi stjórnmálanna. Staða hennar innan flokksins er afar sterk eftir Landsfundinn.

Bjarni Benediktsson er mjög efnilegur og vaxandi leiðtogi. Hann er dugmikill, áræðinn og traustur. 

Hér er um að ræða yfirburða stjórnmálamenn, og kjör þeirra markar tímamót í sögu flokksins og er um leið gott og nauðsynlegt veganesti fyrir Sjálfstæðismenn í komandi Alþingiskosningum.

Til hamingju Þorgerður Katrín! Til hamingju Bjarni!  Til hamingju Sjálfstæðismenn!