Fræknir Fönksveinar!

Ég var að koma af tónleikum í Rósenberg þar sem ungir Fönksveinar spiluðu alveg frábærlega vel frumsamin lög. Til hamingju strákar! Þið eigið framtíðina fyrir ykkur! Ísland verður sko í lagi ef við eigum fleiri eins og ykkur.

Utan flokka! Utan gátta! Eða hvað?

Ég varð hugsi þegar ég sá Þráinn Bertelson á fundi sem Jóhanna Sigurðardóttir boðaði til, vegna mögulegrar lausnar á Icesavedeilunni.  Á þennan fund voru boðaðir allir formenn flokkanna og svo Þráinn Bertelson. Ef allir þingmenn færu nú að fordæmi Þráins þ.e. í fýlu út í flokkinn sinn, erum við þá ekki komin með hið langþráða persónukjör? Þá sætu núna 63 þingmenn við þetta borð á eigin forsendum, óháðir flokksvilja!

Ertu hugmyndarík/ur?

Frumkvöðlaþáttur í kvöld á ÍNN. Gestir þáttarins eru frumkvöðullinn Gísli Gíslason hrl. og uppfinningamaðurinn Valdimar Össurarson.

Þeir segja okkur frá tveimur félagasamtökum sem þeir eru í forsvari fyrir.

Ertu hugmyndarík/ur? Horfðu þá á þáttinn á ÍNN kl.21 í kvöld 11.janúar 2010.

Þjóðarsátt um IceSave

Ég legg til að þeir sem samþykkja IceSave gefi sig fram við bankann sinn og skrifi undir skuldabréf fyrir sig og afkomendur sína um að borga þessar skuldir sem Landsbankinn stofnaði til.
Hinir sem ekki samþykkja IceSave eru lausir allra mála. Er þá ekki málið leyst?

Brotin sjálfsmynd

Hvernig líður börnum sem verða fyrir einelti kennara og/eða annarra einstaklinga í skóla?
Hvert geta þessi börn leitað ef hinir fullorðnu bregðast í skólanum? Hvaða áhrif hefur þetta á börn?
Þegar börn byrja í skóla eru þau full eftirvæntingar. Þau eru misjöfn eins og þau eru mörg. Sum eru orkumikil og skapandi, jafnvel kunna þau alla stafina og eru byrjuð að lesa. Sum kunna líka á tölvur og jafnvel erlend tungumál. Þegar í skólann er komið þá þarf að fara eftir reglum og námsskrá. Börnin eru komin inn í kassann. Þau sem ekki rúmast vel í kassanum fara að rekast á. Þau fara að fá neikvæða athygli, þau þykja óstýrilát, þau eru send til skólastjórans, þau eru send í greiningu og þau eru sett á lyf svo þau rúmist betur í kassanum.
Börnum sem verða fyrir einelti kennara eða annarra skólaliða er almennt ekki trúað þó þau reyni að gefa það til kynna við foreldra eða skólastjóra. Þau eru bara álitin óþæg og eiga ekkert gott skilið.
Börn sem eru í þessari aðstöðu í skólanum missa trúna á sjálfan sig. Þau treysta því ekki að þau geti gert neitt rétt. Þau hafa aldrei fengið að njóta sín. Þau þróa með sér skólaleiða og sjá ekki tilgang í því að mæta á stað sem þeim líður illa í. Sjálfsmynd þeirra er brotin og mikil hætta er á að þau þrói með sér einhverns konar fíkn t.d. tölvufíkn og í kjölfarið kemur einangrunin.
Brotna sjálfsmynd er erfitt að laga og getur tekið alla ævi.

Einelti kennara.

Einelti hefur verið mikið í umræðunni undanfarið. En alltaf er fjallað um einelti eins og það eigi sér stað aðeins á milli nemenda. Getur verið að kennarar og aðrir fullorðnir einstaklingar í skólum leggi börnin í einelti? Tekur Olweusar áætlunin á því? Hvert geta börnin snúið sér? Er þeim trúað ef þeir saka fullorðna um einelti í sinn garð? Getur verið að þetta sé vandamál í skólum, en er þaggað niður?

Hægt er að horfa á Frumkvöðlaþætti á www.inntv.is

Eggert feldskeri var gestur minn 25.nóv. Hann sagði mér frá reynslu sinni af því að vera frumkvöðull. Hann átti m.a. þátt í því að nýta fiskiroð í flíkur. Í þættinum kynnir hann einnig nýjustu afurðir sínar. Ég hvet ykkur til þess að horfa á þáttinn enda er Eggert maður sem fer ótroðnar slóðir.

Eggert og blúsdívan Zora Young

Frumkvöðlakonur komnar í úrslit!

7 íslenskar konur eru komnar í úrslit til Evrópuviðurkenningar fyrir nýsköpun! Eru þetta ekki frábærar fréttir og tilbreyting frá Ice-save?
Það ræðst 8.okt. í Helsinki hvort einhver af þeim fær fyrstu verðlaun í sínum flokki. Konurnar er: Alexandra Argunova fyrir að byggja brú milli tveggja menningarheima, Ágústína Ingvarsdóttir fyrir Life- Navigation, Herdís Egilsdóttir fyrir Landnemakennsluaðferðina, hönnun og bókarskrif, Hulda Sveinsdóttir fyrir heilsukoddan Keili, Guðrún Guðrúnardóttir fyrir gifstappa, Margrét Pála Ólafsdóttir fyrir Hjallastefnuna og Rósa Helgadóttir fyrir hönnun og endurvinnslu. María Ragnarsdóttir verður í hópi dómara en hún komst í úrslit árið 2007, fyrir tæki til að mæla starfsgetu lungnanna. Svo verð ég ein af ræðumönnum og tala um KVENN og nýsköpun og tengslanet. 
Til hamingju stelpur! 

Frumkvöðlar á ÍNN kl.20.30 í kvöld, mánudaginn 28.sept.

Hvað er Blái herinn? Tómas Knútsson segir okkur allt um það.
Café Álftanes. Hvar er það? Bogi Jónsson, þúsundþjalasmiður, segir okkur m.a. frá athyglisverðri sýningu sem er hægt að skoða þar núna.

Frumkvöðlaþáttur á ÍNN í kvöld kl.20.30

Í kvöld fræðumst við um Nýsköpunarkeppni grunnskólanemenda og "Legókallinn"
Missið ekki af þessum þætti. Er hugvit barna og unglinga vannýtt auðlind?