Alkabréfin segja alla söguna!

Ég fékk eftirfarandi sögu senda og leyfi mér að birta hana hér:
"Hilda er bareigandi í Berlín. Til þess að auka veltuna þá ákveður hún að leyfa dyggum viðskiptavinum—sem flestir eru atvinnulausir alkar—að drekka út á krít.

Hún skráir allt sem drukkið er í þykkan kladda. Þegar þetta þægilega fyrirkomulag spyrst út þá flykkjast nýir viðskiptavinir á barinn. Frelsi fólks til þess að njóta augnabliksins og borga seinna gefur Hildu valið tækifæri til þess að hækka verðið á vinsælustu veigunum, bjór og víni

Salan eykst gífurlega. Ungur og efnilegur lánafulltrúi í hverfisbankanum gerir sér grein fyrir að þessar skuldir viðskiptavinanna eru framtíðarverðmæti. Hann hækkar því yfirdráttarheimild Hildu í bankanum. Lánafulltrúinn telur þetta vandræðalaust vegna þess að skuldir alkanna eru haldgóð veð.

Í höfuðstöðvum bankans breyta sérfræðingar í æðri peningalist þessum viðskiptaskuldum í Drykkjuskuldabréf, Alkabréfavafninga og Gubbuafleiður. Þessi verðbréf—sem virt áhættumatsfyrirtæki hafa (gegn þóknun) stimplað AAA gæðastimpli—ganga síðan kaupum og sölum út um allan heim. Raunverulega skilur enginn hvað nöfn bréfanna þýða eða hvernig þau eru tryggð. Samt sem áður halda þau áfram að hækka. Þau eru metsöluvara.

Einn góðan veðurdag, þrátt fyrir að bréfin séu enn á uppleið, þá ákveður áhættusérfræðingur bankans að nú sé tímabært að drykkjuhrútarnir á bar Hildu borgi eitthvað upp í skuldirnar. Þeir geta það hins vegar ekki. Hilda getur því ekki staðið í skilum við sína skuldunauta og lýsir yfir gjaldþroti. Drykkju- og Alkabréf falla um 95%. Gubbubréfin gera betur og ná stöðugkeika eftir 80% fall. Nýr veruleiki blasir við hjá fyrirtækjum sem seldu barnum á lánakjörum og hafa jafnvel líka fjárfest í fyrrnefndum bréfum. Heildsalan sem seldi Hildu vín er gjaldþrota og fyrirtækið sem seldi bjórinn er yfirtekið af keppinauti.

Eftir dramatísk fundahöld og andvökustundir sem standa samfleytt í marga sólarhringa þá ákveða stjórnvöld að bjarga bankanum.

Nýr skattur er lagður á. Bindindismenn eru látnir borga brúsann."

Athugasemdir

[hordur halldorsson (IP-tala skráð) 7.5.2009 kl. 13:44]

Takk Elinóra þessa sögu ætla ég að segja einhverjum .Gott grín á Enron viðskiptafræðina. Drykkjuskuldabréf, Alkabréfavafninga og Gubbuafleiður.

[Jón Óskarsson (IP-tala skráð) 7.5.2009 kl. 18:12]

.... og Sjálfstæðisflokkurinn og Framsóknarflokkurinn komu þessu á hér á landi og hefði ugglaust gert allt til að endurvekja það.

Sagan er í sjálfu sér skemmtileg en hættir að vera það þegar reikningurinn kemur.

[Hildur Helga Sigurðardóttir, 7.5.2009 kl. 18:30]

Er nú svo bláeyg að ég hélt að alkarnir hefðu allir farið í meðferð, mætt svo tárvotir og borgað drykkjuskuldirnar samkvæmt tólfsporakerfinu !  Og barmærin Hilda verið Happí ever after ...

Góð dæmisaga samt, þó að hún endaði á annan veg 

[Sjóveikur, 8.5.2009 kl. 04:50]

www.icelandicfury.com 

frábær saga sem skýrir allt svo einfaldlega og vel að jafnvel ég fatta  mjög gott hjá þér

byltingar kveðjur, sjoveikur