Hver er mælikvarði velferðar?

Velferð mannsins verður ekki einungis mæld í peningum. Velferð mannsins felst í möguleikum hans til að ná þroska og fá að þróast í víðum skilningi. Velferðarmál ættu því að beinast að því að skapa manninum hagstætt umhverfi til að hann geti lifað heilbrigðu og innihaldsríku lífi. Þetta kann að hljóma einfalt en er mjög flókið í framkvæmd.

Ýmsar mælistikur hafa verið notaðar á velferð svo sem lífslengd, möguleikar til þekkingaröflunar, læsi, hreinlæti, aðgengi að hreinu vatni, orkunotkun og fleira mætti telja. Allt byggist þetta á tölfræði en erfitt er að þýða setningu svo sem; „Þau lifðu löngu, heilbrigðu og innihaldsríku lífi“ yfir á kalt, hlutlægt táknmál tölfræðinnar. Talnaröðin 10110101 00101010 segir lítið um tilfinningar okkar. Slík tölfræði í miklu magni getur þó gefið okkur nákvæmar og yfirgripsmiklar upplýsingar um ástand ólíkra landsvæða og meðal ólíkra þjófélagshópa.

Talnarunur hafa um árabil stjórnað litla Íslandi. Talnarunur, sem fáir hafa skilið hafa runnið um flatskjái landsmanna eins og óræður boðskapur frá æðri máttarvöldum. Nú er tími til kominn til að ýta þessum boðskap til hliðar, gefa honum frí um stundarsakir. Við þurfum nú að hlusta hvert á annað og ræða málin. Við þurfum að glæða aftur lífi í gömlu gildin, sem gerðu landið byggilegt í yfir þúsund ár. þá kemur e.t.v. í ljós, hvar hinn sanna mælikvarða á velferð okkar er að finna.

Með bestu kveðju,

 Elinóra Inga

Athugasemdir

[Hólmfríður Bjarnadóttir, 22.2.2009 kl. 01:57]

Sumun þykir bara svogaman að reikna, en án gríns. Lífið er meira en tölur og vísitölur, meðaltöl og frávik. Við erum að mínum dómi að færast æ meira yfir í andlegu og tilfinningalegu hlutina. Farin að hugsa meira um hvernig okkur líður og hvers vegna.

Samskifti eru mjög mikilvægur hlutur. Hérna í Kaupfélaginu á Hvammstanga var komið fyrir nokkrum borðum og stólum til hliðar við innganginn fyrir nokkrum árum. Þetta litla kaffihorn er orðinn fastur puntur í lífi margar. Menn koma þarna saman á morgnana, ná sér í Fréttablaðið og um leið helstu fréttir svæðisins. Heimsmálin eru leyst og mikið hlegið.

Svona hlutir eru mikilvægir og vonandi gerum við meira af því að hittast af tilefnislausu og spjalla